حوار خاص للتيكتوكر المحقق زوما |اليوم التاسع.

 

كتـبت ميـرنا صقـر 

- عمرك حسيت إنك بتخاف من حاجة الناس حواليك بيشوفوها تافهة؟ زي مثلًا تـصرخ لو شُـوفت صرصار، أو قـلبك يدق بسرعة لو دخلت مكان مقـفول، أو حتى ترفض تركب طيارة مهما حاولوا يقنعوك؟ أو حتـي تخاف تركب اسانسير؟ أو الخوف من الزحمة، لو حصل ده فأنـت غالبًا مش جبان ولا بتهـوّل، أنت بس ممكن تكون مصاب بحاجة اسمها "فوبيا" الفوبيا مش هزار، ومش بس "خوف عادي"، دي حالة نفسية بتسيطر على الجسم والعقل، وبتخلي رد فعلك أكبر بكتير من حجم الموقف الحقيقي ..

الفوبيا (Phobia)

- هي اضطراب نفسي يُصنّف ضمن اضطرابات القلق، وبتتمثل في خوف شديد وغير منطقي من شيء أو موقف معيّن، سواء كان حيوان، مكان، نشاط، أو حتى فكرة .. الشخص المصاب بالفوبيا بيكون واعي إن خوفه مش طبيعي، لكن مش بيقدر يتحكم فيه، وده بيأثر بشكل كبير على حياته اليومية، الفوبيا مش مجرد "خوف عادي"، لكنها حالة مرضية معترف بيها في الطب النفسي، وتم تصنيفها بشكل رسمي في دليل DSM-5 اللي بيستخدمه الأطباء النفسيين لتشخيص الاضطرابات ..

طب إيه الأسبـاب؟ 

نشاط زايد في "اللوزة الدماغية" (Amygdala): في جزء في المخ اسمه "اللوزة الدماغية"، مـسؤول عن الخوف لو الجزء ده بيشـتغل زيادة عن الطبيعي، الـمخ بيبدأ يبالغ في رد الفعل لأي حاجة بسيطة ويعتبرها تهديد كبير، وده بـيؤدي لفوبـيا.

خلل في كيمياء الدماغ، في مواد كيميائية زي السيروتونين والنورإيبينفرين بتتحكم في المزاج والخوف، لما بيحصل خلل فيها، الجسم والمخ بيبقوا أكثر حساسية لأي موقف، وده بيزوّد فرص الإصابة بالفوبيا .. 

الوراثة (الجينات): العلم أثبت إن الفوبيا ممكن تنتقل في العائلات يعني لو في حد من العيلة عنده اضطرابات قلق أو فوبيا، فـيه احتمال أكبر إن شخص تاني في نفس العيلة يـجيله نفس النـوع من الخوف ..

-التـعلُّم الشرطي (Pavlovian Conditioning):

لو حـصل مـوقف مرعب في الطفولة - زي وقف الاسانسير أو عضة كلب - أو مكان مغلق .. المخ ممكن يربط الموقف ده بحاجة معينة، وكل ما يشوفها بعد كده يفتكر الخوف، ويتكوّن عنده فوبيا منها .. 

و ممكن الأطفال بالذات بيتعلموا من اللي حواليهم، يـعني لو شافوا أمهم أو أبوهم بيخـافوا من حاجة معينة، ممكن يتعلموا نفس رد الفعل ويكبروا عليه من غير ما يكون عندهم تجربة شخصية ..

أعـراض الفـوبيا بتحـصل إزاي؟ وبتظهر في إيه؟

-لما الشخص اللي عنده فوبيا يتعرض للحاجة اللي بيخاف منها - سواء كانت حـيوان، موقـف، مـكان، أو حتى فكرة - جسمه وعقله بيدخلوا في حالة إنذار، ودي أشهر الأعراض اللي بتحصل: 

أعراض جسدية:

ضربات قلب سريعة أو قوية جدًا و صعوبة في التنفس أو إحساس بالاختناق، تعرّق شديد و رعشة في الأطراف أو الجسم كله، دوخة أو شعور بعدم التوازن و غثيان أو اضطراب في المعدة ، جفاف في الفم و إحساس بالحر أو البرد فجأة.

أعراض نفسية:

خوف شديد لا يمكن السيطرة عليه و رغبة قوية في الهروب من المكان، شعور بأنك هتموت أو هتفقد السيطرة، توتر وقلق متصاعد حتى من قبل ما الموقف يحصل و تجنّب تام للحاجة اللي بتسبب الخوف (حتى لو كانت بسيطة جدًا) ..

- في دراسات علمية اتعملت في السويد (من معهد كارولنسكا) على 1100+ زوج توائم أطفال (سن 8–9 سنين) أثبتت إن فـيه دور وراثي وواضح للفوبيا، خصوصًا مع فوبيا الحيوانات والحقن، والتحليل طويل الأمد بين إن جينات جديدة تبدأ تشتغل مع مرحلة المراهقة، بينما البيئة المشتركة ليها تأثير أقل مع الوقت، تحليـل ميتا عالمي شمل 10 دراسات للتوائم وضّح إن فوبيا الحيوانات وراثتها حوالي 45٪، وفوبيا الدم/الحقن حوالي 33٪.

وفي الولايات المتحدة، من بيانات Virginia Twin Registry للتوائم البالغين، نسب الوراثة اللي اكتشفوها كانت عالية: حوالي 67٪ لـ agoraphobia، و59٪ لـ فوبيا الدم، و47٪ لفوبيا الحيوانات .. 

 الفوبيا مش كلها شكل واحـد، العلماء قسموها لأنـواع، عشان نعرف نتعامل معاها ونعالجها بشكل أوضح، أنواع الفوبيا: 

الفوبيا المحددة (Specific Phobia): خوف من حاجات معينة زي: الحيوانات (زي الكلاب أو الصراصير) و المرتفعات و الأماكن الضيقة و الدم أو الحقن 

 الرهاب الاجتماعي (Social Phobia): خوف من المواقف الاجتماعية أو الكلام قدام الناس، بسبب الخجل الزايد أو الخوف من التقييم ..

 رهاب الأماكن (Agoraphobia): خوف من الأماكن الواسعة أو الزحمة أو المواصلات، الشخص بيحس إنه مش هيعرف يهرب لو حصل حاجة ..

إزاي بنعالج الفوبيا؟ (طرق العلاج) فيه طرق علمية كتير ثبت نجاحها في علاج الفوبيا، حسب نوع الحالة وشدتها، ومن أهمها: 

العلاج الدوائي و العلاج السلوكي المعرفي (CBT): ده أشهر وأقوى طريقة لعلاج الفوبيا، المعالج بيشتغل مع المريض علشان يغير طريقة تفكيره في الحاجة اللي بيخاف منها، ويكسر الحلقة اللي بتربط بين الموقف ورد الفعل المبالغ فيه .. 

-المريض بيتعرض للحاجة اللي بيخاف منها بشكل تدريجي، في بيئة آمنة وتحت إشراف متخصص، لحد ما دماغه يبدأ يتعود وميخافش منها .. 

-الفوبيا مش ضعف، ومش عيب، ومش حاجة نضحك عليها دي حالة نفسية علمية، وليها تفسير، وليها علاج ، المـهم إننا مانسـتخفش بمشاعر اللي حواليّنا، ونكون دايمًا فاهمين إن الخوف مش دايمًا "دلَع"، ممكن يكون صرخة من العـقل والجسم محتاجة حد يسمعها ، ولو حسيت إنك بتخاف من حاجة بشكل مبالغ فيه، متخليش الخوف يسوق حياتك … خد أول خطوة واطلب المساعدة، وده مش عيب، بالعكس، دي شجـاعة