في حضـن الإعـتماد .. بيحبـك علشان يعيـش.

كتبـت: ميـرنا صقـر

في ناس طول الوقت محـتاجين يبـقوا حواليهم حد، مايعرفوش ياخدوا قرار لوحدهم، دايمًـا عاوزين دعم وتشجيع ولو الشخص اللي بيعتمدوا عليه اختفى حتى يوم، بيتلخـبطوا تمامًا! ممكن تقول عليهم "عاطفيين" أو "حساسين"، بس الحـقيقة إن ورا التصرفات دي شخصية إسمها "الشخصـية الإعـتمادية "، واللي بتأثر على حياتهم بشكل كبيـر جـدًا.

- الشخصية الاعتمادية (Dependent Personality Disorder) هي نوع من اضـطرابات الشخصية اللي بيخلي الشخص دايمًا حاسس إنه محتاج حد يسنده في كل حاجة بيبقى عنده صعوبة ياخد قرارات بنفسه، وعنده خوف شديد من الفقد أو الهجر، وعشان كده بيعمل أي حاجة عشان تفـضل الناس جنبه، حتى لو على حساب كرامته أو راحته النفسية ..

الأسبـاب:

الخوف من الرفض أو الفقد بعض الأشخاص عندهم خوف داخلي مزمن من إن الناس تسيبهم أو ترفضهم، حتى من قبل ما ده يحصل فعلًا، الخوف ده ممكن يكون ناتج من تجربة قديمة زي انفصال الأهل أو خيانة حد مقرب، الشخص اللي بيشوف نفسه أقل من غيره أو دايمًـا بيشك في قدراته، بيكـون محتاج دايمًا حد يطمنه ويقوله "أنت صح"، فبيتعود يعتمد على غيره في كل خطوة ..

- كمان نقص الخبرة أو التدريب على الاستقلال .. لو الشخص مـتعلمش وهو صغير ياخد قرارات أو يتحمل مسؤولية، ممكن يكبر وهو مبيعرفش يتصرف من غير توجيه أو دعـم خارجي .. ولو الأب أو الأم نفسهم كانوا بيعتمدوا على بعض أو على الآخرين بشكل مبالغ فيه، فالطفل ممكن يقلد النموذج ده ويعتبره الطبيعي ..

- الحرمان العاطفي في الطفولة .. الطفل اللي محصلش على حب واهتمام كافي، ممكن يكبر وهو دايمًا بيدور على أمان وحب مطلق من أي حد، وده بيخليه يدخل في علاقات اعتمادية، في بعض المجتمعات، بيتم تربية البنت أو الولد على الطاعة المطلقة أو الاعتماد على رأي الكبار، وده بيغرس فيهم الإعـتمادية كـ "سلوك مقبول" أو حتى "مطلوب"

الأعـراض:

عدم القدرة على اتخاذ قرارات يومية من غير الرجوع لحد و صعوبة في التعـبير عن رأيه لو مختلف عن اللي حواليه، وخوف شديد من إن الناس تسيبه أو تبعد عنه، دايـمًا بيحاول يرضي الناس علشان يفضلوا في حياته، بيحـس بالعجز أو الضياع لو لوحده، وممكن يدخل في علاقات مؤذية بس علشان ميكونش وحيد، و بيتهرب من المسؤولية أو المواقف اللي فيها استقلال.

- طب تفتـكر الفـن قدر يعبـر عن الإعتماد بطريقته الخاصة و الإجابة آه لأن الفن أوقات بيقدر يوصّل الـمشاعر أكتر من الكلام العلمي ومن أكثـر الأغاني اللي عبّرت عن الاعتماد العاطفي الزايد هي أغنية "أنا بعشقك" للفنانة ميـادة الحنـاوي وهي بتقول: انا بعشقك انا .. انا كلى لك أنا ، انا انا انا يا مين ملك روحى بهواه .. الأمر لك طول الحياه .. الماضى لك .. و بكرا لك .. و بعده لك

- هنا الأغنية بتجسد صورة واضحة للشخص الاعتمادي، اللي مش بيشوف نفسه غير من خلال الشخص التاني، وبيعتبر وجوده وسعادته وكل تفاصيل حياته مربوطة بوجود حد معين جنبه وده بالضبط اللي بيحصل مع الشخصية الاعتمادية بيعيش طول الوقت محتاج دعم خوف من الفقد، وتعلّق شديد حتى لو ده بيسبب له ألم، فالأغنية هنا مش مجرد حب، لكنها مثال صريح على التعلق المرضي وفقدان الاستقلال النفسي

- دراسة نُشرت في مجلة Clinical Psychology Review (2011): الدراسة دي عملت مراجعة لأكتر من 20 بحث عن الشخصية الاعتمادية، ولقوا إن العلاقة بين الأهل والطفل هي العامل الأقوى في ظهور الاعتماد النفسي، خاصة لو كان فيه إهمال أو تقليل من قيمة الطفل في الصغر، وكمان أكدوا إن التشخيص المبكر بيقلل من تطور الأعراض وبيخلي العلاج أسرع وأنجح ..

و كان في بحث اتعمـل في جامعة "أكـسفورد" (2015) أكد إن فيـه علاقة بين الشخصية الاعتمادية وبين انخفاض "الصورة الذاتية" للشخص، يعني الشخص بيشوف نفسه قليل ومش قادر، وده بيخليه دايمًا محتاج رأي ودعم من اللي حواليه ..

و في دراسة اتعملـت فـي الجمعية الأمريكية للطب النفسي (APA): نشرت الجمعية دراسة في الدليل التشخيصي والإحصائي للاضطرابات النفسية DSM-5، وأكدت إن الشخصية الاعتمادية بتبدأ من سن المراهقة أو بداية البلوغ، وغالبًا بتستمر لو مفيش تدخل علاجي، وبتقول الدراسة إن السبب الأساسي بيرجع لطبيعة العلاقة مع مقدمي الرعاية في الطفولة، خصوصًا لو كان فيها سيطرة مفرطة أو تجاهل للاستقلال الشخصي ..

العلاج:

مفيش دوا بيعالج "الشخصية" نفسها، لكن لو فيـه مشاكل تانية ممكن تظهـر زي القلق أو الاكتئاب، ساعتها ممكن الدكتور ممكن يوصف أدوية تساعد في تهدئة الحالة لفتـرة مؤقتة ..

- العلاج النفسي (Psychotherapy): وخصوصًا العلاج المعرفي السلوكي، اللي بيشتغل على تعديل أفكار الشخص عن نفسه واعتماده على غيره.

- الشخصية الاعتمادية مش ضعف ولا دَلع، هي اضطراب حقيقي محتاج وعي وفهم، الناس اللي عندهم الشخصية دي مش عايزين غير الأمان والدعم، لكن بيحتاجوا كمان يتعلموا يثقوا في نفسهم ويقفوا على رجليهم .. ولو أنت أو حد قريب ليك حاسس إنه مش قادر يعيش من غير الآخر، يبقى لازم تبدأ خطوة نحو العلاج علشان الاستقلال مش معناه الوِحدة، لكن معناه إنك تكون سند لنفسك قبل ما تستنى حد يسندك ..