غرائز الجاني.
يا من تظُن نفسَك بطل ما أنتَ سوى مُجرم تحركهُ غرائزه، يا من تفتخر بِـعَدد ضَحاياك ما أنتَ سوى وباءٍ على المُجتمع، يا من تُعظم من كونِكَ رجُل؛ ما أنتَ إلا ذَكر بالفطرة، ذكر مُشوه فِكريًا ونَفسيًا، ما أنتَ سوى مُتحرش.
تعالوا نِركن المُتحرش على جمب دلوقتي ونحلل أشياء علمية الأول.
إيه هو التحرُش أصلًا، متى يُسمى الشخص مُتحرشًا؟
التحرُش ده يا سيدي هو تعدي، هو إنتهاك؛ سواء إنتهاك لِـجَسد أو لِـمشاعر، هوٰ إقتحام لِـخُصوصيتي دون وجه حَق، التحرُش هو أي فعل مُمكن يسببلي ضيق وتوتر، وحالة من عدم الراحة والأمان، التحرُش وفاعلُه شيئان منبوذان من المُجتمع.
بِـمُجرد سَماعِنا لِـلفظ التحرُش، تتضارب الأفكار في مُخيلتنا، بس في الغالب والنهاية بتختزل تحت بند التحرُش الجنسي، لكن الجدير بالذِكر إننا إكتشفنا مؤخرًا أنواع تانية من التحرُش، ويمكن هي الأكثر سِيادة وإنتشارًا من التحرُش الجنسي.
التحرُش الجنسي زي ما بنقول..معروف أولُه من أخرُه، ليه علامات مُميزة، واضحة وصريحة محدش يقدر يختلف عليها، بس كل الإختلافات والمُناقشات بتكمُن في النوعين التانين من التحرُش، يعني مثلًا..
لو ماشية في الشارع وشخص قال كلمة تعُد من كلمات المُغازلة، فَ ده تحرُش لفظي، أي تعليق على شكلي أو شكل جسمي ده يُطلق عليه تحرُش لفظي.
بإختصار التحرُش اللفظي هو أي نوع من أنواع الكلمات المعسولة من شخص أنا مش مُتقبله منُه الكلام ده، وفي بعض الأحيان هو شكل من أشكال خدش الحياء والمشاعر.
يعني التحرُش لفظي وجنسي بس؟
لأ أبدًا، ده في الكارثة الأكبر، بل إحنا كَــمُجتمع وأشخاص مش بنعتبرُه تحرُش من الأساس، النوع ده يُسمى بالتحرُش الإلكتروني، وده واضح معناه من إسمُه؛ هوٰ التحرُش اللِ بيتم عَبر مواقع التواصل الإجتماعي، وأشكالُه كتيرة جدًا.
تعرفوا إن جُملة "ممكن نتعرف؟" اللِ بتتبعت من أكونت شخص لِـ أكونت شَخص تاني ده إسمُه تحرش إلكتروني، وإن الرسايل دي دليل قاطع إنه يستحق لقب مُتحرش بجدارة، طيب أقولكوا حاجة تانية مش هَتصدقوها؟
المُتحرش اللِ قال هاتي رقمِك، ممكن نتعرف، نبقى صُحاب، أو أي شيء من هذا القبيل، أو اللِ إتسببلك في ضِيق عمتًا، إنتِ تقدري تقدمي فيه بلاغ وتحبسيه من سنتين إلى أربع سنوات، بل كمان تخليه يدفع غرامة تتراوح قيمتها بين 100000 إلى 200000 جنية، إنتوا مُتخيلين الموضوع وصل لِـفين، والقانون في صفِك و واقف معاكِ لِـ أي درجة؟
التحرُش الجنسي مش تودُد، التحرُش اللفظي مش مُجاملة، التحرُش الإلكتروني مش شيء عابر أقدر أتجاوزُه وأتخطاه.
ــ صَفـــا أحمَّـد |صُوفِــيّا
تعليقات
إرسال تعليق