حوار: ليلى إمام
عرفينا بنفسك؟
غادة عبد الله، عندي ٢٤ سنة، ودكتورة أسنان.
امتى بدأت فكرتك؟
بدأت بالظبط في شهر ٨ / ٢٠٢٠ كان في شنطة عجبتنى من اللولى شوفتها على بنترست مكنش حد بيعمل الشنط دي وقتها فقلت انزل اجيب أنا الخرز واجرب اتفرجت على فيديوهات كتير على اليوتيوب وجربت في كذا حاجة لغاية ما الحمد لله بقيت بفهم طريقة عمل الشنطة لو جديدة مثلا من الصورة بتاعتها .
منين بتستوحي أفكار الشنط؟
اشكال الشنط اللى بعملها في حاجات بتبقى تريندي مثلا في حاجات بتبقى على حسب الكلاينت عايزة الشنطة فيها ايه وساعات بتكلم معاهم اشوفهم عايزين ايه وبنعمل شكل الشنطة سوا وميزة الحاجة دي أن مفيش شنطة بتبقى شبه التانية كل شنطة فعلا بتاخد من روح صاحبتها.
لي اختارتي تعملي شنط هاند ميد؟
اختارت شنط الهاند ميد تحديدًا ليه هو أنا من زمان وأنا في المدرسة بحب شغل الهاند ميد يعنى كنت اتعلمت كروشيه وتريكو والحاجات اللى بتكون إعادة تدوير أى حاجة اقدر اطلع فيها أفكاري يعنى فلما جربت الشنط دي حسيت فيها إنى اقدر فعلا استغل الشغف بتاعي ناحية الهاند ميد واوظفه في حاجة تكون عملية وفي نفس الوقت جديدة وشكلها حلو.
منين بتجيبي الخامات؟
الخامات بجيبها من اماكن في طنطا هنا أو ساعات لما بسافر مكان والاقى فيه حاجة جديدة بجيبها بحيث إنى احاول أجدد في الشغل دايما وأقدم كواليتي كويسة مختلفة عن غيري.
ما الصعوبات التي تواجهك؟
الحاجات الصعبة بتكون يعني مواقف فردية يعنى اوقات كتير بيكون الخرز مش موجود أو المقاس اللى بيتعمل منه الشنطة دى بتكون مشكلة شوية أو مثلا الاكسسوار بتاع تكملة الشنطة مش موجود.
إزاي السوشيال ميديا ساعدتك؟
السوشيال ميديا دخلتها في شهر ١٠ /٢٠٢٠ لما أهلي واصحابي شجعوني إنى أعرض حاجتي على جروب فعملت جروب واخترت اسم للبراند وعملت لوجو بنفسى وكل اللى كان بيشوف الشنط علل الحقيقة أو في الصور كانت بتعجبه أوى فبدأت واحدة واحدة أعمل أشكال جديدة وشوية وعملت بيدج على الانستجرام وشوية عملت بيدج على الفيسبوك ساعدني ده كتير أن الحاجات اللى بعملها تتشاف مش في النطاق اللى حواليا بس لا أوسع كمان ومن خلالها بردو منظمين معارض كلمونى إنى انزل في ايفنت أو اشترك معاهم أن حاجتي تتعرض على بيدج بتاعتهم وكل ده بيساعد طبعا.
ما هو حلمك الذي تسعي إليه؟
بحلم أن الشغل يوصل لنطاق أوسع واستغل حبي للحاجات التانية وادخلها بحيث تفيدني في فكرة الشنط وأن اسم البراند يبقى معروف.
تعليقات
إرسال تعليق