صحتك النفسية
الأخصائية / أسماء علي عودة
مفيش صحة من غير صحة نفسية، ومفيش نفسية من غير سلام داخلي
لو عايز توصل لصحة نفسية كويسة لازم تبدأ من جواك
علم النفس بيقول إن الشخص الصحيح نفسيًا هو اللي بيعرف يتعامل ويتكيّف مع المواقف الحياتية المختلفة
طب إزاي توصل للمرحلة دي؟
تعالى نعرف سوا
أولًا: تقبّل الألم ومشاعرك بدل ما تكبتها
أول خطوة إنك تتقبل الألم وتحترمه تعترف بوجوده وتفهم إن كبت الشعور مش حل لأن الكبت مش بيختفي هو بيتخزن جواك وبيطلع بعد كده في صورة تانية سواء كانت :
اكتئاب
أعراض جسدية زي وجع في المعدة، القولون، شحوب في الوجه
سقوط شعر أو ارتفاع ضغط وقلب مضطرب
مش عيب أبدًا إنك تبين انكسارك متفضلش دايمًا في دور القوي اللي من جواه بيقع كلنا بشر، والإنسانية هدفها مش السلبية، بل الإصلاح، وأول حاجة لازم تصلحها هي "نفسك". لما تبدأ بنفسك هتتفاجئ قد إيه العالم حواليك بيتغير بدون ما تبذل مجهود خارجي كبير
ثانيًا: اشتغل على عضلة الصبر
كل صفة جوانا زي العضلات محتاجة تدريب عشان تقوى عضلة الصبر دي من أهم العضلات النفسية، وهي اللي بتساعدك تنجح في الدنيا والآخرة
لكن المشكلة إن مؤخراً حياتنا اللي بقت كلها إلكترونيات وذكاء صناعي خلتنا نخسر الصبر بدون ما نحس بقينا عايزين كل حاجة دلوقتي وحالًا حتى الهو والـ "أنا الأعلى" بقوا عايزين نفس الحاجة : لذّة عاجلة
بقينا بنستسهل كل حاجة مستنين الرد يحصل في ثانية، ولو اتأخر شوية بننهار!
طب نعمل إيه؟
قلل الإشباع السريع
اختار نشاط بتحبه واعمِله بهدوء لمدة شهر
صلي بهدوء وخشوع
اشرب ميّه بهدوء دي سنة عن النبي ﷺ.
اتعلم تحتضن الملل، لأن وراه فايدة كبيرة
قلل استخدام الريلز ومتسرّعش الفيديوهات
اسمع أي فيديو توعوي براحة عشان تفهمه، مش بس تخلّصه
ثالثًا: الصحة البدنية أساس للصحة النفسية
الجسم والنفس مرتبطين ببعض حافظ على :
رياضتك: حتى لو نص ساعة في اليوم.
نومك: قلة النوم بتأثر على تركيزك وشهيتك ومزاجك
أكلك: خليك في الأكل الصحي.
اللي مش بينام كويس بيبقى شبه واحد شارب خمر؟
وقلة النوم كمان بتخليك تاكل كتير وتفضل حاسس إنك مش شبعان أبدًا، خصوصًا وإنت سهران
رابعًا: احترم نفسك وقدّرها
ناس كتير عندها صورة سلبية عن نفسها، وده بسبب:
المقارنة المستمرة
جلد الذات اللي اتزرع من الطفولة
ربنا خلق النفس وكرّمها، ليه إحنا بنحقرها؟
لو فضلت تجلد نفسك، الشيطان هيستغل ده ويقنعك إن مفيش فايدة، وإن كل حاجة بايظة، وإنك مش هتتغير وده بيحصل بالذات مع الإدمان، الإباحية، والصلاة
احترام النفس يعني إنك تصلّحها، ومش هتصلّح حاجة إلا لما تحبها
فابدأ بحب نفسك، عشان تعرف تشتغل عليها
خامسًا: التواصل وبناء العلاقات
العلاقات الجيدة من أهم أسرار السعادة
اتعلم تعبّر عن نفسك، عن احتياجاتك
اشتغل على وعيك بذاتك، وافهم نفسك بعمق
سادسًا: راقب أفكارك
متعظّمش المشاكل
اتكلم مع نفسك كأنك مربيها، مش بتعاقبها
الحوار الداخلي من أكتر الحاجات اللي بتوصلك للسلام النفسي
ومتخليش تركيزك في التفاصيل يسرق طاقتك
حاول تقلل من السوشيال ميديا، لأنها عدو الوعي
أي معلومة تاخدها، فكّر فيها كويس، بمعنى أصح اهضمها قبل ما تتكلم بيها زي الأكل كده، مش بناكله ونسيبه، لازم يتهضم
سابعًا: الإيمان درعك النفسي
كل ابتلاء في حياتك وراه حكمة
متقعدش تندب حظك ، بالعكس، كل ما يزيد الابتلاء لو استقبلته بإيمان، هتزيد قوتك النفسية
بس خليك فاكر إن الإيمان الصح لازم يبقى مبني على عقيدة صحيحة
كل ما كانت معتقداتك سليمة، كل ما كان إيمانك أقوى وسندك النفسي أثبت
في الختام:
الصحة النفسية مش رفاهية، هي أساس الحياة
ابدأ بنفسك، بصبر، بحب، باحترام، وبقلب مؤمن، وهتلاقي نفسك إنسان تاني
تعليقات
إرسال تعليق