حوار خاص للتيكتوكر المحقق زوما |اليوم التاسع.

 قلب بارد وعقل متلاعب داخل دماغ الشخصية السيكوباتية

كتبـت: ميـرنا صقـر 

- أكيد قابلـت قبل كده شخص ما بيهتمش بمشاعر غيره، دايمًا بيأذي اللي حواليه من غير ما يرمش له جفن! ممكن تشوفه قاسي أو متبلد، بس الحقيقة إن ده ممـكن يكون شخص عنده سمات سيكوباتية، الشخصية السيكوباتية مش دايمًا شكلها واضح وناس كتير حوالينا ممكن يكونوا بيحملوا الصفات دي وإحنا مش واخدين بالنـا، ومن هنـا تبدأ الحكاية علشان نكتـشـف اللي ورا الهدوء الظاهري ونفهم السيكوباتية بجد .. 

- الشخصية السيكوباتية، واللي اسمها في الطـب النفسـي Psychopathy، نـوع من الشخصيات اللي ما بتحسّش بغيرها، وما بتتأثرش بمشاعر الناس مهما كانت قاسية، الشخص ده بيبقى بارد جدًا من جـوه، ما بيهتمـش إذا كان بيجرح أو بيأذي، وبيتصرف كأن الناس حواليه أدوات بيستخدمهم وبس، غالبًا بيكـون شاطر في الكلام وبيعرف يسيطر على اللي حواليه، بس تصرفاته فيها تلاعب وأنانية وكذب متكرر، ومن غير أي إحساس بالذنب أو تأنيب الضـمير .. 

طب إيه الآسباب: 

- الإستعـداد الوراثي: فيه ناس بتتولد وعندها استـعداد جيني يخليهم أكتر عرضة لتكوين صفات زي البرود أو قلة التعاطف، أو الاندفاع، الدراسـات لقت إن مناطق معينة في الدماغ، زي "الأميجدالا" و"الفص الجبهي"، بتكون أنشطتها مختلفة عن الطبيعي عند الناس دي، وده بيأثر على قدرتهم على الإحساس بالذنب أو الخوف.

- الطـفولة اللي ما فيهاش أمان: الطفل اللي بيتربّى في بيت كله توتر و عنف و إهمال، أو مفيهوش حب ده بيكبر وهو مش حاسس بقيمته، ومش شايف إن المشاعر ليها معنى، و هتلاقيه بيتعود على القسوة كأنها العادي، وبيبني حمايته النفسية عن طريق التجاهل والبرود، وفي حالات معينة، بيبدأ يتعامل مع اللي حواليه على إنهم أدوات يستخدمهم و يضحك عليهم ويكسرهم، من غير ما يحس بتأنيب ضمير ..

خلل في تكوين المخ: الطب النفسي اكتشـف إن السيكوباتيين بيكون عندهم خلل في أجزاء في المخ المسؤولة عن التحكم في السلوك والمشاعر، زي الأميجـدالا و بتكـون المسؤولة عن الخوف والتعاطف، والفص الجبهي اللي بيساعد على ضبط النفس واتخاذ القرار، الخلل ده بيخلي الشخص ما يحسش بالخطر، وما يتعاطفش مع الألم، وما يتأثرش برد الفعل الطبيعـي زي باقي الناس .. 

الأعـراض: 

الشخص السيكـوباتي مش لازم يبان من أول نظـرة، لكن فيـه شوية أعـراض واضحة: 

- ما بيحسش بحد عنده برود ، وما بيتأثرش بمشاعر اللي حواليه كذاب وممثّل، يقولك كلام حلو بس نيّته مش صافية، أناني وبيستغل الناس و بيفـكر في نفسه بس، حتـى لو ده هيأذي غيره، ما عندوش ضمير يعمل الغلط وما يحسش إنه غلطان .. 

- الباحثين ما وقفوش عند ملاحظة السلوك، لكن دخلوا جوه دماغ الشخص السيكوباتي علشان يعرفوا إيه اللي بيخليه يتصرف بالقسوة والبرود ده ، ومن هنا بدأت تطلع دراسات كتير بتشرح الصورة أكتر، في دراسـة أتعملت في أمريـكا على ناس عندهم سمات سيكوباتية، ولقوا إن فيه نشاط ضعـيف جدًا في "الأميجدالا"، وده الجزء في المخ اللي بيتحكم في المشاعر، الخوف، والتعاطف .. يعني ببساطة المخ مش بيستقبل مشاعر الناس زي الطبيعي، و كمان في تجربة في جامعة أكسفورد - إنجلترا عرضوا مشاهد مؤلمة على مجموعة من السيكوباتيين، زي حد بيتعذب أو بيتألم ، والمفاجأة إن ما حصلش عندهم أي رد فعل عاطفي و لا تعاطف ولا خوف … كأنهم بيتفرجوا على إعلان بسيط! 

طب إيه هي طرق العـلاج: 

العلاج السلوكي المعرفي (CBT)، ده نوع من الجلسات النفسية بيحاول يغير طريقة التفكير اللي بتخلّي الشخص يؤذي غيره.

بيخلّيه يفهم مشاعر اللي حواليه، ويبدأ يشوف إن تصرفاته غلط حتى لو هو مش حاسس بده .. هل فيه أدوية؟

 مفيش دواء "بيعالج" السيكوباتية نفسها، لكن أحيانًا الدكتور ممكن يكتب أدوية تقلل التهيّج، أو العدوانية أو التوتر، خصوصًا لو الشخص عنيف أو مندفع جدًا ..

- الشخص السيكوباتي مش دايمًا هيبان من أول نظرة، ومش دايمًـا هيمشي في الشارع بإشارة بتقول "أنا مؤذي" أحيانًا بيكون أقرب حد لينا بيتكلم حلو وبيضحك وبيفهمك، وفي نفس الوقت بيكسّرك بالبُطئ وانت مش واخد بالك .. الفهم هو أول خطوة للحماية، السيكوباتية مش بس في الأفلام هي حوالينا، في ناس شكلهم طبيعي، بس جواهم عالـم مظلم ما يعرفش يعني إيه وجع غيره .. خلي وعيك دايمًا سابقك، وحدودك واضحة ونفسك غالية.