الأحلام في علم النفس
الأخصائية/شيماء حمادة
الحلم هو تعبير عن الرغبات المكبوته ودي الجمله اللي كلنا بنرددها وكلنا عارفينها
ولكن ايه هو التغيير اللي افكار الاحلام بتمر بيها قبل ما تتحول الى الحلم الواضح اللي بنفتكره لما نصحى؟ وازاي بيحصل؟ وايه مصدر الماده اللي اتحولت لحلم؟ وممكن الحلم يقول لنا حاجه جديده عن عملياتنا النفسيه الداخلية؟ وهل ممكن مضمون الحلم يصحح او يغير رأي معين عندنا ؟
الاحلام من اكثر الحاجات المحيرة ...لما بنقول كلمه حلم بيجي في بالك صوره عشوائيه شويه مشاهد متقطعه حدوته بتحصل في دماغك وانت نايم او كابوس يقلب نومتك كلها
تخيل معايا ان الحلم عباره عن تغيرات ذهنيه بتمر بيها الافكار في دماغنا طول الليل لحد ما نوصل للمرحله اللي بنشوف فيها المشهد اللي بنفوق عليه ونفتكره لما نصحى .
طب ايه بيحصل الافكار دي عشان تتشكل وتتحول لحلم بنعيشه واحنا نايمين؟ بمعنى تاني ازاي الافكار تتحول لحلم واضح ؟
الفكره بتبدا كانها همسه في دماغنا حاجه شارده كده موجوده في الخلفيه طول النهار دماغنا شغاله زي الاله باستمرار افكار مشاعر احداث مواقف ورا بعض باستمرار باستمرار باستمرار وكانها عاركه يا صديقي وبالليل بقى اول ما نحط دماغنا على المخده يبدا المخ يحاول يعالج ويفكك الحاجات دي كلها كانها اعاده تدوير لافكارك
الفكره بتبدا تتكون في اللاوعي وبتتحول لحلم بيحاول يلخص المشاعر والافكار اللي مرينا بيها وده تفسير انك ممكن تلاقي الحلم مزيج لمواقف وأشخاص وأماكن مالهمش اي علاقه ببعض في الحياه الواقعية وكأن دماغك يا صديقي جمعت كل الحاجات اللي ما قدرش وعيك يعالجها خلال اليوم وطلعهالك في الحلم
طيب ايه هو بقى مصدر الحلم ؟!
الاساس للحلم هو خبراتنا الشخصيه مشاعرنا تصوراتنا للحياه رغباتنا مخاوفنا و كل المكبوتات من الاخر
العقل اللاوعي بيحب يلعب بالحاجات اللي شافها طول اليوم ويطلعهالك في احلامك
ذكريات قديمه ..مشاعر حالية. توتر ..قلق.. افكار غريبه مرت عليك بالنهار ..والافكار اللي شغلاك عن المستقبل
طب هو ممكن الحلم يقول لنا حاجه جديده انا عملياتنا النفسيه الداخليه ؟!
كثير من علماء النفس بيقولوا ان الاحلام ممكن تكون فعلا بعد جديد في فهم العمليات النفسيه بتاعتنا لانها زي رسائل من اللاوعي بتحاول تفهمك انت حاسس ايه ومحتاج ايه وكان مفتاح بيفتح باب احنا مش شايفينه بعنينا بسبب الكبت
تعليقات
إرسال تعليق