لمـا الثقـة تتحول لسمّ في الـعلاقات
كتبـت: ميـرنا صقـر
أوقـات كتيـر بنقابل ناس بنحبهم بجد نديهم من روحنا، ومن وقتنا، ونحاول نخليهم يحسّوا إنهم مش لوحدهم، بس فالأخـر بنخرج من العلاقة وإحنا فاضيين من جُوانا، تعبانين، ومش فاهمين: "إحنا ليه كنا بنعتذر على حاجـات ما عملنهاش؟"
"ليه كنا بنحس دايمًا إننا المقصرين؟" اللي بيـحصل ده مش حب ده ممكن يكون بسبب شخصية نرجسية مش بتهينك بالكلام، لكن بتمحيك بالبطّيء، النرجسية مش كلمة بنستخدمها في أي نقاش
ده اضطراب نفسي حقيقي، ليه جذور وليه ضحايا ..
- سمعت قبل كدة عن شاب إسمه نارسيسوس، نارسيسوس كان وسيم جدًا، وكل الناس كانت بتحبه لكنه كان ما بيشوفش غير نفسه ولا بيعجبه حد وبيبعد عن أي حد يحاول يقربله، وفي يوم شاف صورته منعكسة على سطح الميّة وعجبته صورته لدرجة إنه عشقها، وقعد يتفرّج على نفسه ومقدرش يتحرك ولا ياكل، ولا يشرب لحد ما مات، ومن هنا طلع الاسم اللي بقى رمز لأي حد عايش في حب نفسه، ومش شايف الناس اللي حواليه.
طب إيـه الشخـصية النرجسيـة:
- الطب النفسي بيعرّف الاضطراب ده، حسب "الدليل التشخيصي DSM-5" على إنه: نمط ثابت من الإحساس المبالغ فيه بالعظمة، والحاجة الشديدة للإعجاب، مع نقص واضح في التعاطف، وده بيبدأ من سن المراهقة وبيستمر في مواقف الحياة المختلفة يعني الشخص مش بس شايف نفسه مميز، ده محتاج الناس تفضل تمدحه وتطبطب عليه وتنفّذ اللي في دماغه وفي نفس الوقت، مش بيعرف يحس بمشاعر غيره، وممكن يأذيهم من غير ما يحس، أو يحس وما يفرقش معاه ..
الأعراض اللي هتظهر عليه:
- دايمًا شايف نفسه أفضل من غيره و بيتوقع معاملة خاصة و بيتجاهل مشاعر اللي حواليه بيستغل الناس لمصلحته، حساس جدًا للنقد و بيغير الحقيقة عشان يحافظ على صورته، يبان في الأول لطيف جدًا، بس يسيب اللي حواليه مكسورين جدًا ..
- الأسباب اللي ممكن تبقي ورا النرجسية: عوامل وراثية - بيولوجية، أو فيـه بعض التغيرات الهرمونية و الكيميائية في المخ مواد زيادة ومواد ناقصة في تأثر علي السلوك و التصرف، و كمان ممكن يكون سببه: تربية فيها تمجيد مبالغ فيه (زي: "إنت أحسن من الكل") أو على العكس إهمال وتحقير في الطفولة، صدمات نفسية مبكرة .. يعني النرجسية - أوقات بتتزرع بدري في حياة الشخص، وبتكبر جواه من غير ما ياخد باله.
- دراسة أتعملت في ألمانيا سنة 2013 (نشرت في مجلة PLOS ONE) استخدمت أشعة fMRI على المخ، ولقوا إن اللي عندهم صفات نرجسية بيكون عندهم نشاط أقل في جزء اسمه anterior insula، وده المسؤول عن "التعاطف مع الآخرين".
- و كمان في سنة 2015، مجلة Journal of Child and Family Studies نشرت دراسة قالت إن الأطفال اللي بيتربوا مع أبوين نرجسيين، بيتأثروا نفسيًا بشكل كبير، وبيكون عندهم صعوبة في بناء علاقات صحية في المستقبل.
و طبـعا، الفن قدر يعبر عن ده من خلال أغنيه ما بتفرحش للفنانة شـيرين عـبد الـوهـاب، لمـا قالت:
ما بتفرحش غير لفرحـك ما بتحزنش غير لجرحك ما بتتعبش غير لصالحك إنت عايش ليك وبس
آه لو أبقى زيك إنت أعرف أفرح وأبكي إمتى كنت عمري ما أحبك إنت يعني عمري ما كنت أحب
هل للنرجسيـة علاج؟
أيوه، النرجسية لها علاج، وده بيبدأ لما الشخـص يعترف إنه محتاج مساعدة.
أهـم طرق العلاج:
العلاج النفسي : بيساعد الشخص يفهم نفسه، ويلاحظ سلوكه وتأثيره على غيره، و أحيانا أدوية مساعدة: لو فيه قلق أو اكتئاب مصاحب والأهم من كل ده: الإرادة والاعتراف بالمشكلة
- خلـي بالـك الشخـص النرجسي مش دايمًا صوته عالي أحيانًا بيكسرك بابتسامة، ومش دايمًـا هيغلط فيـك .. بس ممـكن يخليك تشـك في نفسك وتبعد عن روحك، وتعيش وإنت مش عارف إنت مين؟
- النرجسية مش وصـف ولا كلمة بنرميها في خناقة ده اضـطراب نفسـي لازم نعرفه نفهمه ونحمي نفسنا من أذاه، والمعرفة دايمًـا أول خطوة في الحماية ..
تعليقات
إرسال تعليق