اسمـع جسمـك لما يحكـيلك عن اللي جـواك.
كتبـت: ميـرنا صقـر
-عمرك حسّيت إنك تعبان من غير سبب واضح؟ بتشتكي من الـصداع أو وجع في المعدة والدكاترة بيقولوا مفيش حاجة؟ ساعتها ممكن تكون مشكلتك مش في الجسم .. لكن في النفس! الأمراض النفس جسدية بقت منتشرة جدًا، وناس كتير مش مدركة إن التوتر أو القلق والحزن ممكن يكونوا هما السبب الحقيقي للوجع اللي بتحس بيه، المـوضوع أكبر ممـا نتصـور، دي رسالة من جسمك إن فيـه وجع جواك لأزم تسـمعه قبل ما يتكلم بطـريقته.
-طب يعني إيه الأمراض النفس جسدية؟
المرض النفسي الجسدي Psychosomatic Disorder، هي حـالة بتظهر فـيها وجع جسـدي حقيقي، بس سببه الأساسي مش في الجسم نفسـه، لكن في الحالة النفسية، يعني مـثلًا اللي عنده قلق مستمر ممكن يحس بسرعة ضربات قلب، أو اللي مكتئب ممكن يشتكي من وجع في الظهر أو المعدة، و الدكاترة بيأكدوا إن الدماغ لما يـكون تحت ضغط نفسي، بيبـدأ يبعت إشارات لأعضاء الجسم، فتبدأ الأعراض الجسدية في الظهور، حتى لو العضو سليم تمامًـا ..
الآسبـاب:
القلق المستمر: لما تكون دايمًا قلقان من بكرة، أو خايف من حاجة تحصل، المـخ بيكـون في حـالة طوارئ، وده بيأثر على ضربات القلب والمعدة والنوم.
كـبت المـشاعر: لما تـكتم الزعل أو متعرفش تعـبر عن وجعك، الجسم هو اللي بيطلّـع كل ده في شكل وجع زي القولون، أو حساسية جلدية، أو خنقة ..
الضغط النفسي المزمن: المـشاكل في الشغل، أو المسئوليات الكتيرة ، أو حتى الدراسة كل ده بيـستهلك الجهاز العصبي، والجـسم بيـدفع التـمن بعد شويـة.
الصدمات النفسية القديمة: زي فقـدان حد غالـي أو تـجربة عنف أو طفولة صعبة، الحاجات دي ممكن تفضل جوه الجسم سنين، وتظهر بعدين في شكـل وجع جسدي مفاجئ..
نمط حياة مرهق: سهر، أو أكل مش صحي و مفيش رياضة، ولا راحة ساعتها الجسم بيضعف ومع أول ضـغط نفسي و يـنهار.
تربية قاسية أو بيئة مكبوتة: في ناس اتربوا في بـيوت فيها تعنيف أو قمع مشاعر، أو مفيش حوار بيتعلموا يدفنوا إحساسهم، فـالجسم بيبـدأ يعبر عن اللي مش قادرين يقولوه.
الأعـراض:
بتكون صداع مزمن و وجع في المعدة أو القولون ، آلام في الضهـر أو الرقـبة، خـنقة أو ضيق تنفس خفقان القلب، تعب مسـتمر حتى مع النوم الكفاية، مـشاكل في الجلد زي الإكزيما أو الحبوب، و مـشاكل في النـوم والأرق ..
فـي دراسة اتعملـت فـجامعة هارفارد - أمريكا بـعنوان "The impact of chronic stress on the body"، وأثبتت فيها إن التوتر النفسي المزمن بيأثر بشكل مباشر على الجسم، و لقوا إن ناس كتير بتشتكي من أمراض زي ارتفاع ضغط الدم، اضطراب القولون والتعب المزمن بسبب القلق والتوتر، مش بسبب مرض عضوي ..
يعني ممكن الجسم يكون سليم في الإشاعات والتحاليل، لكن حالتك النفسية مش أحسن حاجة فتطلع الأعراض على الجسم ..
و فـي دراسة اتعمـلت فـي جامعة ميونيخ - ألمانيا بعنوان "Psychological factors in patients with functional somatic syndromes"، وركزت على الناس اللي عندهم أعراض جسدية مستمرة من غير تفسير عضوي، الدراسة لقت إن أكتر من 60% من الحالات دي، السبب فيها نفسي زي القلق أو الاكتئاب، مش مرض عضوي ..
يعني وجع المعدة، الخنقة الصداع المتكرر .. ممكن يكون مصدرهم وجع نفسي مش متشاف!
العـلاج:
بيكون من خلال العلاج السلوكي المعرفي (CBT)، وده بيساعد الشخص يفهم مشاعره، ويتعامل مع التوتر والقلق بطريقة صحية بدل ما الجسم يشيل ..
و علاج دوائي (لو لزم الأمر)
الدكتور ممكن يكتب مضادات اكتئاب أو مهدئات خفيفة تساعد على التوازن النفسي، وده طبعًا بيكون تحت إشراف طبي فقط.
-ولو فيه وجع جسدي شديد، بيتعالج بالأدوية العادية لكن في نفس الوقت بنعالج الأصل النفسي.
في الآخـر، لأزم نفهم إن الجسم مش بيخونك .. هو بس بيحاول يقولك إن فيه وجع جواك محتاج تسـمعه، مش دايمًا لما تحس بوجع يبقى لازم تاخد مسكن، ساعات كل اللي محتاجه إنك "تسمع نفسك."
لو بتحس بتعب مش مفهوم، أو وجع ملوش تفسير، ما تتكسفش تروح لطبيب نفسي .. النفسية زيها زي أي عضو في جسمك، لما تتعب لازم تتعالج.
و افتكـر دايمًا: اللي بنخـزنه جوا بـيظهر على وشنا، و جسمنا وفي صحتنا .. اسمع نفسك قبل ما جسمك يضطر يصرخ عشان تسمعه.
تعليقات
إرسال تعليق