كتبـت: ميـرنا صقـر
فـيه ناس حياتهـم زي الـموج، مرة فوق في الـسما طاقة وحـماس، ومرة تحت في قاع الحـزن واليأس. الموضوع مش مزاج متقلب ولا "دلع"، ده ممكن يكون اضطراب نفسي اسمه اضـطراب ثنائي القـطب، وده بيأثر جـدًا على حياة الشخص وشغله وعلاقاته باللي حواليه.
طـب إيه هو ثنـائي القطـب.
اضطراب ثنائي القطب (Bipolar Disorder) هو اضطراب بيخلي الشخص يمر بفترات بيكون فيها في حالة هوس أو هـوس خفيف، ودي بيكون فيها طاقة زايدة أو كلام كتير، نشاط غير طبيعي .. وبعدها تيجي فترات اكتئاب شديد أو حزن و فقدان طاقة وانعزال ..
الأسبـاب: لحد دلوقتي العلماء بيقولوا إن مفيش سبب واحد محدد لاضطراب ثنائي القطب، لكنه بييجي نتيجة تفاعل أكتر من عامل مع بعض منـهم:
العوامل الوراثية: الدراسات لقت إن لو فيه قريب من الدرجة الأولى (أب، أم، أخ) مصاب، النسبة بتزيد لـ 10%–15% بدل 1% بس عند باقي الناس، كمان فيه جينات معينة زي CACNA1C و ANK3 مرتبطة بالمرض.
خلل في كيمياء المخ: النواقل العصبية المسؤولة عن المزاج زي الدوبامين، السيروتونين، النورأدرينالين لو حصل فيها خلل، بتأثر على المشاعر والطاقة. زيادة الدوبامين مرتبطة بنوبات الهوس، وانخفاضه مرتبط بالاكتئاب.
تغيرات في بنية المخ ووظايفه:
تصوير المخ بالرنين المغناطيسي بيبين إن مناطق زي القشرة الجبهية الأمامية (اللي بتتحكم في القرارات) واللوزة الدماغية (اللي بتتحكم في المشاعر) بيكون فيها اختلافات عن الطبيعي.
اضطراب الساعة البيولوجية:
أي خلل في دورة النوم والاستيقاظ بيأثر على هرمونات زي الكورتيزول والميلاتونين، وده ممكن يسبب نوبات.
عوامل بيئية وضغط نفسي: صدمات عاطفية، فقدان شخص عزيز، أو أحداث كبيرة في الحياة ممكن تحفز أول نوبة عند الناس اللي عندهم استعداد جيني ..
الأعـراض:
نوبة الهوس أو الهوس الخفيف: طاقة عالية ونشاط زائد، قلة النوم بدون إحساس بالتعب، أفكار كتير وسريعة، قرارات متهورة أو مخاطرة.
نوبة الاكتئاب:
حزن عميق وفقدان الإهتمام، صعوبة في التركيز، نوم كتير أو قليل جدًا، أفكار سلبية أو انتحارية.
في دراسـة أتعملت في جامعة هارفارد - "2016" أهمية العلاج المبكر
في دراسة طويلة المدى، تابع الباحثون مرضى بعد أول نوبة هوس أو اكتئاب، و النتيجة كانت واضحة اللي بدأوا العلاج فورًا بعد النوبة الأولى كانت النوبات اللاحقة عندهم أقل حدة وأقل عدد، وفترات الاستقرار أطول، لأن التدخل المبكر بيمنع حدوث تغييرات دائمة في كيمياء المخ، وده بيقلل احتمالية الانتكاس..
و فـي دراسة فـي جامعة أكسفورد - 2021 النوم كمفتاح للوقاية
مـتابعة 500 مريض لمدة عام أظهرت إن اضطراب النوم أو قلة النوم بيضاعف خطر النوبات في الشهر التالي، لأن الـنوم ينظـم الهرمونات والنواقل العصبية، وأي خلل فيه بيحفز النوبات ..
العلاج الدوائي: أدوية بيكـتبها الطـبيب مثل مثبتات المزاج ومضادات الاكتئاب أو الهوس، تساعد على السيطرة على الأعراض ومنع تكرار النوبات.
العلاج النفسي: يشمل جلسات العلاج المعرفي السلوكي (CBT) لتغيير الأفكار السلبية، والعلاج الأسري لدعم المريض من عائلـته ..
اضطراب ثنائي القطب مش ضعف شخصية ولا مزاج متقلب عادي، ده اضطراب نفسي محتاج وعي وفهم ودعم للشخص اللي بيعاني منه ممكن يعيش حياة مستـقرة ومـنتجة لو لقى العلاج الصح، والمجتمع دوره مهم في إنه يفهم بدل ما يحكم علي
الحالة .. الفهم هو أول خطوة للعلاج، والكلمة الطيبة ممكن تكون طوق نجاة لشخص في عز أزمتـه.
تعليقات
إرسال تعليق