كتبـت: ميــرنا صقـر.
في حـياتنا بنقابل ناس بيحبوا العزلة والهدوء، مش بيـشاركوا كتير في الجَمعات الكبيرة ولا بيحبوا الأضواء، و كتيـر ممكن الناس تفهمهم غلط، ويقولوا عليهم متكبرين أو مش اجتماعيين، لكن الحقيقة إن الموضوع أعمق من كده، ده جزء من سمات الشخصية اسمه "الانـطوائية"، وليه جذور وأسباب بتخلي الشخص يميل أكتر للعالم الداخلي بتاعه عن الخارج.
طب إيه الشخصية الانطوائية؟
الانـطوائية هي سـمة من سمات الشخصـية بتتحدد في علم النفس على إنها مـُيول الفرد لتركيز انتباهه وطاقته على عالمه الداخلي (الأفكار، المشاعر، التأمل) أكتر من العالم الخارجي (الناس، الأحداث، المثيرات) الأشخاص الانطوائيين عادة بيستمدوا طاقتهم من العزلة والأنشطة الفردية، وبيشعروا بالإرهاق أو الضغط بعد التفاعل الاجتماعي المطوّل ..
الآسباب:
الجينات والوراثة
في ناس بتتولد بجينات بتخلي مخها حساس أكتر للمؤثرات يعني هو من صغره طبيعته يميل للهـدوء ومش بيحـب الدوشة.
طريقة التربية والجو الأسري
لو الطفل اتربى في بيـت هادي، أو أهله مش اجتماعيين قوي، أو حتى كانوا بيشجـعوه دايمًا يقعد في أمان وميتعاملش كتير مع الناس، ده ممكن يخليه يميل للانطـوائية.
تجارب الطفولة
زي مُثـلاً لو اتعرض لتـنمّر أو اتكسف قدام الناس، أو كان عنده تجارب محبطة مع صحابه أو أهله ، التجـارب دي بتأثر وتخـليه يفضل يبعد عن المواقف الاجتماعية ..
طبيعة المخ والمواد الكيميائية،
العلماء اكتـشفوا إن الانطوائيين مخهم بيتعامل مع "الدوبامين" (مادة بتدي إحساس بالمتعة والنشاط) بشكل مختلف علشان كده بيشبع بسرعة من الزحمة والمثيرات، ويفضل الأنشطة الهادية.
الثقافة والمجتمع.
في بعض المجتمعات اللي بتركز على الخصوصـية أو اللي بتقدّر التفكير والتأمل أكتر من الاختلاط، الشخص ممكن يتعـلم إنه يكون انطوائي أكتر ..
مـهم نفهم إن مش أي انطوائية تبقى طبيعية، في فرق كبير بين إن الواحد يحب الهدوء ويستمتع بعالمه الداخلي، وبين إنه يدخل في عزلة مؤلمة، الانطوائي الطبيعي بيحب يقعد مع نفسه عشان يرتاح، عنده أصحاب قليلين بس غاليين عليه، وبيلاقي راحته في أنشطة زي القراءة أو الكتابة.
لكن لو العزلة دي بقت طول الوقت ومعاها إحساس بالوحدة والحزن، أو بقيت سبب إنه يبعد عن شغله ودراسته وعلاقاته، ساعتها الموضوع بيتحول لمشكلة، كمان لو فيه خوف مبالغ فيه من الناس أو أفكار سلبية زي (أنا مش مهم أو محدش بيحبني)، دي مش مجرد انطوائية عادية، دي علامة إن الشخص محتاج مساعدة من مختص و استشارة نفسية
الأعراض:
الأعراض الطبيعية: يحب يقعد لوحده عشان يرتاح ويفكر ، عـنده أصحاب قليلين لكن علاقاته معاهم عميقة وصادقة، بيحب الأنشطة الفردية زي القراءة، الكتابة، الرسم أو التأمل، بـيفكر قبل ما يتكلم ويختار كلماته بعناية، مستـمع كويس وبيفهم الناس ويعـرف يتعامل معاهم، عنده تركيز وإبداع عالي في شغله أو دراستـه.
الأعراض اللي تلزم تدخل طبي.
عزلـة مؤلمة وشعور دائم بالوحدة والحزن، خوف أو قلق مبالغ فيه من التعامل مع الناس أو التجمـعات، تراجع في الحياة العملية أو الدراسية بسبب تجنب المجتمع، أفكار سلبية مستمرة زي "أنا مش مهم" أو "الناس مش بتحبني"، فقدان الاهتمام بالأنشطة اللي كان بيحبها قبل كده..
في دراسة نُشرت في مجلة "Psychiatry Research" عام 2023 استكشفت العلاقة بين الانطوائية والرفاهية النفسية. أظهرت النتائج أن الانطوائيين الذين يشاركون اجتماعيًا بشكل معتدل يتمتعون بمستوى أعلى من احترام الذات مقارنة بالذين يتجنبون التفاعل الاجتماعي تمامًا، هذه الدراسة تشير إلى أهمية التوازن بين الانطوائية والمشاركة الاجتماعية للحفاظ على الصحة النفسية.
وفي بحث نُشر في "Journal of Social and Clinical Psychology" عام 2022 تناول تأثير البيئة الاجتماعية على الانطوائيين، وجدت الدراسة أن الانطوائيين الذين يتعرضون لمواقف اجتماعية إيجابية يظهرون تحسنًا في مزاجهم وصحتهم النفسية، بيـنما قد تؤدي المواقف السلبية إلى زيادة مستويات التوتر والقلق لديهم.
العـلاج:
العلاج السـلوكي المعرفي (CBT)
يساعد الشخص يغير الأفكار السلبية اللي بتخليه ينسحب من الناس، ويعلمه طرق عملية للتعامل مع المواقف الاجتماعية بثقة أقل توتر.
الانـطوائية مش عيـب، لكـن مش كل انطوائي صـحي، لو الانعزال زاد عن حده وبدأ يأثر على حياته، ده محتاج متابعة من مختـص، الشخص الناجح يعرف يـوازن بين وقت لنفسه ووقت للتواصل مع الناس، ويستفيد من هدوءه في تطوير نفسه وإبـداعه، وكمان المجتمع لازم يقدر الاختلاف ويعطي الانطوائي فرصة للتعبير عن نفسه بدون ضغط، عشان الكل يستفيد من قدراته وعلاقاته تكون صحـيه ..
تعليقات
إرسال تعليق