تفتكر ذكرياتك ممكن تسرق أفكارك؟

كتبت: ميـرنا صقـر

- هل عمـرك حسّيـت إنك جبت فكرة عبقرية، وبعدين اكتشفت إنك شوفتهـا قبل كده من زمان؟ ده مش مجرد توهُّم، ده ممكن يكون "الكريبتومنيزيا".

"الكريبتومنيزيا" أو "الذاكرة المخفية"، هي ظاهرة نفسية نادرة بيحصل فيها إن الشخص يفتكر حاجة قديمة نسي إنه شافها أو سمعها قبل كده، ويفتكرها على إنها فكرة جديدة لسه طالعة من دماغه دلوقتى، فـمثلاً شخص يكتب قصة وهو فاكر إنها من وحي خياله، لكن في الحقيقة هو شاف نفس الفكرة من سنين ولكن نسيـها ..

- في سنـة 1989، عمل الباحثان براون وميرفي تجربة نفسية علشان يفهموا أكتر عن ظاهرة الكريبتومنيزيا، فـجابوا مجموعة من الأشخاص وطلبوا من كل واحد فيهم يبتكـر أفكار فريدة داخل مجموعة و بعد فترة، طُلب منهم يطرحوا أفكار "جديدة"، لكن المفاجأة إن بعض المشاركين اقترحوا نفس الأفكار اللي قالها غيرهم في الجولة الأولى وهما متأكدين إنها فكرتهم الدراسة دي أثبتت إن الكريبتومنيزيا مش مجرد نظرية، لكنها ظاهرة حقيقية بتحصل من غير وعي، وبتخلّي الشخص يفتكر إن الفكرة اللي سمعها أو شافها قبل كده، جاية من دماغه هو ..

- الظاهـرة دي بتحـصل لما المخ يرجع يطلع ذكري من اللاوعي، بس من غير ما يتم ربطها بمصدرها، و فيه طبعًا عوامل بتساعد على ظهور الكريبتومنيزيا زي:

1. الضغط الذهني:

لما العقل يكون مشغول، بيركز على الفكرة وينسى مصدرها.

2. فجوة زمنية:

كل ما كانت الذكرى قديمة، كل ما كانت فرص نسيان مصدرها أكبر.

3. تداخل اللاوعي:

الذكريات القديمة ممكن تختلط بأفكار جديدة من غير وعي.

تأثيـر الكريبتومنيزيا على الإبـداع

- الظاهرة دي ليها تأثير مزدوج أحيانًا بتديك إحساس إنك مبدع، بس لو اتضح إن فكرتك مش أصلية، ده ممكن يعمل إحباط، أو حتى يسبب مشاكل في مجالات زي الفن أو البحث العلمي ..

امتى نلجأ لطبيب نفسي؟

- لو بدأت الظاهرة تحصل معاك كتير، أو بدأت تسببلك لخبطة في الذاكرة، مشاكل في شغلك أو قلق مستمر، من الأفضل تروح لطبيب نفسي في بعض الحالات، الكريبتومنيزيا بتكون جزء من اضطراب أوسع في الذاكرة أو التركيز، وممكن تتعالج بجلسات نفسية أو تدريبات معرفية..

- عقلك أحيانًا ممكن يخدعك، وده مش معناه إنك بتكذب أو بتقلّد، الكريبتومنيزيا بتعلّمنا نراجع أفكارنا، ونفتكر دايمًا إن في جزء من اللاوعي ممكن يظهر في وقت غير متوقَّع بالمرة