هو بيحب يعذبني.. بس أنا بحبه

هو بيحب يعذّبني.. بس أنا بحبه.

كتبـت: ميـرنا صقـر

- أوقات كتير بنسمع من ناس قريبين مننا جملة: "يعذبني بس بحبه"جملة ممكن تعدّي على ودانك كأنها شيء طبيعي، بس في الحقيقة بيكون وراها حكاية مؤلمة، فيها وجع كتير، وفيها نوع حب غريب، بيتلبّس ناس كتير حب فيه دموع، تجاهل، وأوقات خيانة، بس تفضل تقول "أنا بحبه"، ناس تحب تسيطر، توجع، تهدّ، وناس تفضل ساكتة، مستسلمة، الحكاية دي إسمها السادية ..

طب يعني إيه السادية؟

- في علم النفس، السادية هي إن شخص يحس بمتعة أو راحة لما يوجّع اللي قدامه سواء بالكلام أو بالتجاهل أو بالإهانة أو حتى بالألم الجسدي، وكل ما الطرف التاني يتعب أو يتكسّر هو يحس إنه أقوي، السادية و كمان فيه سادية عاطفية يومية - ناس بتستمتع بالسيطرة والضغط على اللي بتحبهم ..

- في سنة 2013، اتعملت دراسة في كندا عن "السادية اليومية"، ولقوا إن في ناس كتير عاديين جدًا عندهم ميول يستمتعوا وهما بيشوفوا غيرهم بيتألم، حتى لو بحاجات بسيطة، في تجربة ضمن الدراسة، خلاّوا الناس "يقتلوا ديدان" بمزاجهم اللي وافق من غير تردد؟ طلع سادي، ودراسة تانية سنة 2009 قالت إن السادي بيحب العدوانية والتحكم أكتر من الحب الحقيقي ..

طب إيه أسباب السادية؟

أولاً: طـفولة مـؤذية اللي اتعرض في صغره لعنف أو تحكم أو إهمال ممكن يطلع عنده رغبة إنه يبقى هو المسيطر، كتعويض عن إحساسه القديم بالضعف كمان نقص في الحب أو الاحتواء زمان

بعض الأشخاص اللي مفتقدين للحب بيحاولوا يمتلكوا اللي بيحبوه بأي طريقة حتى لو بالأذى، وده نوع من التشوّه في طريقة الارتباط العاطفي ..

- عدم الثقة بالنفس، الشخص السادي في العمق غالبًا عنده مشاعر نقص، وبيحاول يعوضها بإنه يقلل من اللي قدامه عشان يحس إنه أعلى و كمان ممكن يكـون عنده علاقات قديمة جارحة في ناس اتجرحت جدًا قبل كده، فبقوا يوجعوا قبل ما يتوجعوا كنوع من "الدفاع الوقائي".

خلل في الشخصية أو اضطرابات نفسية:

أحيانًا بتكون السادية جزء من اضطراب زي "اضطراب الشخصية المعادية للمجتمع" أو "الشخصية النرجسية"، وده مثبت في تصنيفات علم النفس (زي DSM-5) و كمان عوامل بيولوجية ووراثية: الدراسات العصبية الحديثة بتقول إن في نشاط غير طبيعي في مناطق معينة في الدماغ (زي الـ"أميجدالا") عند بعض الأشخاص، وهي المسؤولة عن العدوانية والشعور باللذة وكمـان

في مجتمعات معينة، الشخص اللي "شديد" أو "قاسي" بيتشاف إنه ناجح أو قوي فبيتكرس السلوك ده ويتكرر.

تفتكـر إيه علاقة الأغاني بالسـادية؟

شيـرين عبد الوهاب ليهـا أغنية بتقـول، أنا كلي ملكك وخاتم في صباعك تأمرني أمرك تسيبني أضيع وياك، من برا الأغنـيه تبـان شكلها رومانسية جـدًا لكن من جـوا؟ دي واحدة سلّمت نفسها تمامًا للي بتحبه، من غير شروط، من غير كرامة، من غير حدود هو يأمر؟ وهي تطيع .. وهو يسيبها .. وهي تضيع، هي بقت حرفيًا خاتم في صباعه ومن هنا بييجي الخطـر لأن الشخـص السـادي، لما يلاقي حد بيقول له كده، بيستغل ده ويتمادى في القسوة أكتر، لأنه ضـامن إن الشخـص التاني مش هيمـشي ولا يرفض، مهما حـصل ..

طب طرق العلاج :

- أولاً اللجوء لطبيب نفسي متخصص لأن السلوك السادي أو الاستسلام المزمن ليه جذور نفسية، والطبيب بيقدر يساعد في كشفها والتعامل معاها بأسلوب علمي وآمن ، و كمـان العلاج السلوكي المعرفي (CBT) ده نوع علاج مفيد جدًا سواء للضحية أو للسادي، بيشتغل على تغيير طريقة التفكير والاستجابة، و مُهم تاخٌد وقتك في شفاء نفسك لأن الخروج من علاقة سامة بياخد وقت فمـتلومش نفسك أبدًا ..

- مُـهم تخلي بالك من الإشارات الصغيرة زي نظرات السيطرة، النبرة الساخرة، التقليل من قيمتك قدام الناس ماتسكتش على الإهانة أول مرة تعذيب لازم تكون آخر مرة ، و مهم تتعلم تقول "لأ"، ولو معرفتش لوحدك مهم تلجأ لطبيب نفسي.

و مهم تعرف إن الحـب مش أنا كلي ملكك الحب هو إحنا شركاء نحب ونحمي ونحترم و نحتوي بعض، ولو لقيت نفسك في علاقة فيها وجع متكرر وفي كل مرة بتسامح وتنسى وتستسلم، إسأل نفسك سؤال واحد هو بيحبك ولا بيحب يتحكم فيك؟ لأن اللي بيحبك، مش هيخليك مجروح وتقول "أنا خاتم في صباعك"،

ده هيقولك: أنا ليّا فيك زي ما ليك فيّا … إحنا لبعض، مش فوق بعض ..