اضطراب ما بعد الصدمة (PTSD)

الأخصائية / أسماء علي عودة

يعني إيه PTSD؟

هو اضطراب نفسي بييجي بعد ما الشخص يمر بتجربة صادمة جدًا تجربة أدت إن جسمه وعقله يحسوا إنهم في خطر كبير وسابوا أثر جوا الشخص حتى بعد ما الخطر راح

إيه الصدمات اللي ممكن تسبب PTSD؟

فيه أنواع كتير من الصدمات اللي ممكن تسبب الاضطراب ده، زي :

التعرّض لحادث خطير (عربية – حريقة – سقوط من مكان عالي)

التعرض لاعتداء جنسي أو جسدي

التعذيب أو السجن لفترات طويلة

حضور حرب أو أعمال إرهابية

وفاة حد عزيز بطريقة مفاجئة أو بشعة

التعرّض لزلازل أو كوارث طبيعية

شغل زي الطب أو الإسعاف أو الجيش، بيشوفوا فيه ناس بتموت أو بتتعذب

مش شرط الصدمة تحصل لك أنت ممكن كمان تيجي لو شوفت حد قريب منك بيتعذّب أو بيتأذي جامد

إيه أعراض اضطراب ما بعد الصدمة؟

الأعراض ممكن تظهر بعد أيام أو شهور من الصدمة وفيه ناس مش بتلاحظها غير بعد سنين وأهم الأعراض :

استرجاع الصدمة

يعني بتحس كأن اللي حصل بيتكرر في شكل كوابيس أو فلاش باك (الدماغ تشغّل الحدث فجأة كأنه بيحصل تاني)

تجنّب أي حاجة تفتكّرني باللي حصل

زي أماكن، أشخاص، مواقف، حتى أفكار

تغيرات في المشاعر والسلوك

دايمًا متوتر أو خايف

بتنفعل بسرعة

بتحس بالذنب أو العار حتى لو مكنتش غلطان

فقدان المتعة في الحاجات اللي كنت بتحبها

مشاكل في النوم والتركيز

نوم متقطع أو كوابيس

دماغك مش بتسكت وبتفكر كتير

نسيان وعدم تركيز

إمتى أروح لمختص نفسي ؟

لو حاسس إن الصدمة مأثرة على حياتك اليومية : شغلك، علاقاتك، نومك، أكلك، مزاجك، يبقى محتاج تتكلم مع مختص

خصوصًا لو الأعراض مكملة أكتر من شهر ومش بتتحسن

إزاي الأخصائي بيشخّص PTSD؟

بيعمل مقابلة وبيسألك عن :

الحدث اللي حصل

الأعراض اللي بتحس بيها

تأثيرها على حياتك

ممكن يستخدم استبيانات أو مقاييس لتحديد شدة الحالة لازم الأعراض تكون مستمرة أكتر من ٤ أسابيع علشان يتم التشخيص

هل ليه أنواع؟

أيوا ممكن نعتبر PTSD ليه ٣ أشكال :

1. حادّ: الأعراض أقل من 3 شهور

2. مزمن: الأعراض مكملة أكتر من 3 شهور

3. مؤجَّل: الأعراض تظهر بعد شهور أو سنين من الصدمة

إزاي بيتعالج PTSD؟

العلاج بيكون على حسب الحالة، وفيه أكتر من طريقة:

أولًا: العلاج النفسي (العلاج بالكلام )

العلاج السلوكي المعرفي (CBT): يساعدك تتعامل مع الذكريات والأفكار اللي بتوجعك

العلاج بالتعرض (Exposure Therapy): بتواجه الصدمة بالتدريج لحد ما تأثرها يقل

العلاج بالتنظيم العاطفي وتقنيات الاسترخاء

العلاج الجماعي: فيه ناس بتحب تشارك تجاربها مع ناس مرّوا بنفس الألم

ثانيًا: الأدوية

مش لازم لكل الحالات، بس في أوقات بتكون ضرورية، خاصة مع:

القلق الشديد

الاكتئاب المصاحب

مشاكل النوم

أشهر الأدوية:

مضادات الاكتئاب زي:

سيرترالين

باروكسيتين

فلوكستين

أدوية النوم (بجرعة خفيفة وتحت إشراف)

أدوية مهدئة لفترة مؤقتة في حالات القلق العالي (لكن بحذر)

🛑 مهم جدًا : متاخدش أدوية من نفسك دا مجرد مقال، لازم استشارة طبيب نفسي مش أخصائي نفسي

هل ممكن أتحسن؟

أيوا ، بالعلاج المنتظم والدعم النفسي، ناس كتير بتتعافى من PTSD لكن لازم تكون صبور، لأن العلاج ممكن ياخد وقت، والمشوار مش دايمًا سهل … بس النتيجة تستاهل

أعمل إيه علشان أساعد نفسي؟

احكي عن اللي جواك لمختص أو حد قريب بيفهمك

مارس تمارين استرخاء (تنفس – يوجا – مشي)

ابعد عن الحاجات اللي بتزوّد القلق (كافيين – سهر – أخبار مؤلمة)

اكتشف طرق للتعبير: كتابة – رسم – تدوين

حافظ على روتين يومي حتى لو بسيط

كلمة أخيرة:

اللي حصلك مش بسيط، وجسمك مش ضعيف، هو بيحاول يحميك بطريقته

لو تعبت، دا مش عيب… دي استجابة طبيعية لشيء غير طبيعي

ساعد نفسك إنك تقوم، واطلب المساعدة من ناس متخصصة

لأن الشفاء ممكن … حتى بعد أكتر الصدمات وجعًا