القلق النفسي: الخوف الحاد
الأخصائية/ أسماء علي عودة
الطبيعي إن أي حد فينا يقلق لما يمر بموقف صعب أو حاجة مش مضمونة زي مثلًا قبل امتحان أو لما يكون عنده شغل مهم أو حتى وهو مستني نتيجة تحليل
القلق في اللحظات دي طبيعي وبيخلينا نركز وناخد بالنا
لكن اللي مش طبيعي إن القلق يفضل ملازمك طول الوقت في كل تفاصيل يومك ومسببلك ألم نفسي حقيقي وهنا بيظهر القلق النفسي، واللي هو حالة من العذاب النفسي المستمر مش مربوط بموقف معين لكنه بيأثر على طريقة تفكيرك نومك جسدك وعلاقاتك
طب إيه هو القلق النفسي؟
القلق النفسي هو قلق ملازم ليك على طول حتى من غير سبب واضح دايمًا حاسس إن في مصيبة جاية بتفكر في كوارث لسه محصلتش قلبك دايمًا متوتر عينك مش مرتاحة بتتعصب من أقل حاجة وممكن كمان تكون عصبي جدًا ومش طايق نفسك
بتاخد وقت طويل عشان تنام ولو نمت تحلم بكوابيس وأحيانًا نفس الكابوس يتكرر كذا مرة
ومش بس كده كمان بيبدأ الجسم يتعب لأن الجهاز العصبي اللا إرادي (اللي بيتحكم في القلب والمعدة والأمعاء والشرايين والمثانة والأعضاء التناسلية) بيحصل فيه اضطراب وده يخلي الشخص يحس بأعراض جسدية قوية جدًا مع إن مفيش سبب عضوي حقيقي
طيب إيه الأعراض الجسدية اللي بتحصل مع القلق؟
ضربات قلب سريعة أو غير منتظمة
الإحساس إن القلب هيقف أو هيطلع من مكانه
ضيق في النفس أو "نهجان"
ألم في الصدر
اضطرابات في المعدة (زي القولون، الغثيان، الإسهال أو الإمساك)
صداع
تنميل أو رعشة في الأطراف
الدوخة أو الإحساس بالدوار
صعوبة في البلع
مشاكل جنسية (زي ضعف الرغبة أو سرعة القذف عند الرجالة)
التبول المتكرر أو ألم في المثانة
وغالبًا المريض يتوهم إن عنده مرض في القلب بسبب سرعة ضربات القلب أو الإحساس بهبوط أو يتهيأله إنه هيموت وده بيزود القلق ويدخل في دايرة مقفولة من الخوف والقلق اللي بيغذوا بعض
طب اي هي أنواع القلق؟
1. القلق العام
وده اللي بيكون فيه الشخص قلق طول الوقت من غير سبب محدد بيفكر كتير وبيتوقع الأسوأ
2. نوبات الهلع
فجأة يحس بخوف شديد جدًا مع أعراض جسدية زى خفقان رعشة عرق وإحساس بالموت
3. الرهاب
خوف مبالغ فيه من حاجة معينة زى المرتفعات الأماكن الضيقة الحيوانات الطيران، إلخ
4. القلق الاجتماعي
خوف من التفاعل مع الناس أو التحدث قدام جمهور الشخص بيحس إنه بيتحاكم عليه
5. اضطراب الوسواس القهري
أفكار متكررة ومزعجة (وساوس) بتخلي الشخص يعمل تصرفات معينة بشكل متكرر (قهري)
6. اضطراب ما بعد الصدمة
بييجي بعد التعرض لحادث عنيف أو صدمة قوية وبيظهر في صورة كوابيس تجنب وانفعال شديد
أسباب القلق:
وراثي: لو في تاريخ عائلي للقلق أو الاكتئاب
كيمياء المخ: اختلال في النواقل العصبية زي السيروتونين والدوبامين
ضغوط الحياة: زي الفقد، المشاكل الأسرية، الدراسة، الشغل
الطفولة: التعرض للإهمال أو الصدمات في سن صغير
البيئة: العيشة في بيئة غير مستقرة أو مليانة توتر
الأمراض المزمنة: زى السكر أو القلب أو مشاكل الغدة
تشخيص القلق:
التشخيص بيكون عن طريق الطبيب النفسي أو الأخصائي وبيسألك عن أعراضك ومدى تأثيرها على حياتك وغالبًا بيستخدم استبيانات زي:
مقياس القلق العام
مقياس نوبات الهلع
مقياس القلق الاجتماعي
ولو في أعراض جسدية شديدة ممكن يطلب تحاليل أو فحوصات عشان يستبعد وجود سبب عضوي
العلاج:
العلاج بيختلف من شخص للتاني وممكن يتقسم لـ:
1. العلاج النفسي (العلاج بالكلام)
أشهر نوع هو العلاج المعرفي السلوكي (CBT)،
وده بيعلم الشخص يغير طريقه تفكيره ويتعامل مع القلق
2. العلاج الدوائي
مضادات القلق زي البنزوديازيبين (بس لفترة قصيرة)
مضادات الاكتئاب (زي SSRIs) وبتساعد على المدى الطويل
3. العلاج السلوكي
تغيير العادات اليومية، زي:
ممارسة الرياضة
تقليل الكافيين
النوم الكافي
التأمل والتنفس العميق
البعد عن الضغط النفسي
4. العلاج التكميلي
زي اليوجا، الموسيقى، الجلسات الجماعية، الكتابة عن المشاعر
الخلاصة:
القلق النفسي مش ضعف ومش حاجة تخجل منها هو زي أي مرض تاني ليه أسباب وأعراض ويتعالج
المريض محتاج فهم وتعاطف من اللي حواليه ومحتاج ياخد خطوة ناحية العلاج بدل ما يفضل أسير دايرة الخوف والقلق
لو بتحس إن القلق مخلّيك مش عايش بسلام متترددش تروح لطبيب نفسي
كل يوم جديد ممكن يكون بداية لهدوءك وراحتك
تعليقات
إرسال تعليق