مفهوم التنمر وكيفية التعامل معه

الأخصائية/منة الله العوضي

التنمر هو إن حد يتعامل معاك بطريقة وحشة أو يقلل منك، سواء بالكلام، بالنظرات، أو حتى بالأفعال. ممكن يكون تنمر لفظي، زي لما حد يشتمك أو يضحك عليك، أو جسدي، زي لما حد يضربك ، أو حتى تنمر إلكتروني، لما حد يكتب عليك كلام وحش على النت.

سلبياته بقى كتير ومؤذية:

بيوجع نفسياً، بيخليك تحس إنك قليل أو مش مرغوب.

بينشأ لديك قلة ثقة في النفس، وتبدأ تشك في قدراتك.

ممكن يسبب اكتئاب وتوتر، وتبدأ تعزل نفسك عن الناس.

أوقات بيوصل لدرجة إن الشخص يحس إنه عايز يبعد عن كل حاجة، أو حتى يفكر في إيذاء نفسه.

وكمان بيأثر على تركيزك في المذاكرة أو الشغل، لأنك بتفضل شايل الهم من اللي بيحصل.

التنمر حاجة مؤذية وبتسيب أثر نفسي كبير، عشان كده مهم إننا نواجهه وندعم اللي بيتعرض له.

عشان تواجه التنمر، ممكن تعمل الحاجات دي:

1. اتكلم – ما تسكتش على اللي بيحصل، احكي لشخص تثق فيه زي أهلك، صاحبك، أو مدرسك.

2. تجاهل المتنمر – أوقات التجاهل بيخلي المتنمر يزهق ويوقف اللي بيعمله.

3. ابقَ واثق في نفسك – ما تبيّنش إنك متأثر، قِف بثبات واتكلم بثقة.

4. ما تردش بالعنف – الرد بالعنف ممكن يخلّي الموضوع يكبر أكتر.